ပင်လယ်စာ ချဉ်စပ်ဟင်းရည် “တုမ့်ဆပ် တလေ”

ဒီဟင်းရည်က ရိုးရှင်းတဲ့ ထိုင်းချဉ်စပ်ဟင်းရည်ပါ။ ထိုင်းလူမျိုးတွေက ဒီဟင်းရည်ကို အသား မျိုးစုံနဲ့ ချက်စားလေ့ ရှိပါတယ်။ ကြက်သားနဲ့ဆိုရင် တုမ့်ဆပ် ကိုင်၊ ပင်လယ်စာနဲ့ ဆိုရင်တော့ တုမ့်ဆပ် တလေ ဆိုပြီး ခေါ်ဆိုကြသလို ချက်ရတာလည်း အလွန်ရိုးရှင်း လွယ်ကူတာကြောင့် ဝါသနာရှင်များ အနေနဲ့ အဆင်ပြေလိမ့်မယ်လို့မျှော်လင့်မိပါတယ် …။

ပင်လယ်စာချဉ်စပ်ဟင်းရည် (Hot & Spicy Sea Foods Soup)

ပါဝင်ပစ္စည်းများ

ပင်လယ်စာ (ရောရာ) – ၆၀ ကျပ်သား
ကြက်ပြုတ်ရည် – ၃ လီတာ
ကြက်သွန်နီ – ၃ လုံး (လေးစိတ်ခွဲ)
ခရမ်းချဉ်သီး – ၃ လုံး (လေးစိတ်ခွဲ)
စပါးလင် – ၂ ချောင်း (အဖြူရောင်သာ ပါးပါးလှီးထားရန်)
ပဒဲကော – ၁ တက် (ပါးပါးလှီး)
ဂျင်း – ၁ တက် (ပါးပါးလှီး)
ကောက်ရိုးမှို (သို့) ငွေနှင်းမှို – အနည်းငယ်
ရှမ်းနံနံ – ၁ စည်း
တောရှောက်ခါးရွက် – ၅ ရွက်
ငရုတ်သီးစိမ်းတောင့် – ၇၊ ၈ တောင့်
သံပုရာရည် (သို့) ရှောက်ရည် (လိုအပ်သလို ထည့်ရန်)

ပထမဆုံး ကြက်ရိုးကို ကြည်လင်တဲ့ ပေါင်းရည်ရအောင် ပြုတ်ပါ။ (ကြည်လင်စေရန် အမြှုပ်များကို ခပ်ထုပ်ပစ်ရပါမယ်)။ 
ဆေးကြောသန့်စင် ထားတဲ့ ပင်လယ်စာများကို ရေနွေးဆူဆူမှာ သံပုရာသီး ၁ စိတ်၊ တရုတ်နံနံ နည်းနည်း ထည့်ပြီး ခေတ္တ ရေနွေးထည့်ထားပေးပါ။
ပြီးလျှင် ရေအေးဖြင့် ဆေးပြီး ရေစစ်ထားပါ။ 
ပါဝင်ပစ္စည်းများကို လိုအပ်သလို လှီးဖြတ် သန့်စင်ထားပါ။ အားလုံး အရန်သင့် ဖြစ်ရင်တော့ စချက်ပါမယ်။

ပထမဆုံး ကြည်လင်သော ကြက်ရိုးပြုတ်ရည်ထဲကို ကြက်သွန်နီ လေးစိတ်ကွဲ၊ စပါးလင်၊ ပဒဲကော၊ ချင်း၊
တောရှောက်ခါးရွက် တို့ကို ထည့်ပြုတ်ပါ။
အရသာအဖြစ် ကြက်သားမှုန့်၊ ပာင်းချိုမှုန့် (သုံးတတ်ပါက)၊ ငါးငံပြာရည်၊ သကြားတို့နဲ့ ဖြည့်စွက်ပါ။
ပာင်းရည် တခါ ဆူပွက်လာလျှင် သန့်စင်ထားသော မှိုကိုထည့်ပါ။
မှိုထည့်ပြီး နောက်တခါ ဆူပွက်လာလျှင် မီးပြင်းကို လျှော့ချပါ။
မီးပြင်းပြင်းနဲ့ ထားရင်း ချက်ထားတဲ့ ပေါင်းရည် နောက်ကျိသွား နိုင်ပါတယ်။
ရေနွေးဖျောထားတဲ့ ပင်လယ်စာတွေကို ထည့်ပေါင်းပါ။
အဲဒီအချိန်မှာ ငရုတ်သီးစိမ်းကို ဓားပြားရိုက်ထည့်ပြီး သံပုရာရည် (သို့) ရှောက်ရည် (အသီးကို ညှစ်ထည့်ပါက ပိုမို ကောင်းမွန်ပါမယ်)။
ချဉ် ငံ စပ် အရသာကို မိမိ နှစ်သက်သလို ထည့်ပါ။
စားသုံးခါနီးမှ ခရမ်းချဉ်သီး လေးစိတ်ခွဲနဲ့ ရှမ်းနံနံ ပါးပါးလှီး၊ ငရုတ်ခြောက်တောင့် ကြော်လေးနဲ့ အလှဆင်ကာ (ကြိုက်နှစ်သက်ပါက နံနံပင်ပါ) ထည့် သုံးဆောင်နိုင်ပါတယ် …။

Source: ဧရာဝတီ